Syair Aceh Ayoen Aneuk Deungon Bismillah

Lailahaillah Muhammadur Rasulullah 
Lailahaillah Muhammadur Rasulullah 

Deungon Bismillah Lon Kheun Awai Phon
Ayoen Di Ek Tron Sinyak Mak Doda
Ta Eh Beurijang Wahe Aneuk Lon
Taeh Hay Imbon Lam Ayon Ija

Nyo Ubat Hate Mak Sanjong-sanjong
Gata Aneuk Lon Jantong Hate Ma
Lailahaillah Muhammad Rasulullah
Lailahaillah Sinyak Saboh Beu Meutuwah

Tuwah Aneuk Hana Di Moe-moe
Beu Mangat Asoe Jantong Hate Ma
Beu Mangat Asoe Gata Bohate
Oeh Uro Page Ta Tulong Poma

Beu Bagah Rayek Sinyak Ubit Cut
Ngat Tajak Beut Deungon Sikula
Bak Ta Meuhitung 1,2,3,4 
Supaya Nyak Jeut Takheun Aleh Ba

Ilme Donya Beuna Ta Tuntut
Meuruno Beu Jeut Ilme Agama
Meunyo Na Sikula Tanyo Jeut Keu Buet
Meunyo Tajak Beut Jeut Keu Ulama

Allah Hai Do Ku Do Da Idi
Boh Kaye Khuldi Dalam Syuruga
Menyo Goet Akai Budi Pekerti
Gata Geusayangi Le Ureng Lingka

Sayang-sayang Aneuk Lon Sayang
Timang-timang Sibijeh Mata
Oeh Rayeuk Sinyak Meu Bek Meu Lang-lang
Beu Got Tasayang Ngon Ureng Tuha

Beuna Ta Pateh Aneuk Meutuwah
Bek Sinyak Bantah Su Ureng Tuha
Na Ridha Poma Na Ridha Allah
Meunan Geupeugah Dalam Agama

Bek Sampe Aneuk Durhaka Di Kah
Syurga Indah Yup Gaki Poma
Meu Bek Taseu'ot Peu Yang Mak Peugah
Meu Bek Tabantah Meu Sikrak Haba

Allah Hai Do Ku Doda Idang
Mak Sayang-sayang Sinyak Puteh Di
Mak Do'a Sinyak Hudep Beu Seunang
Neubri Le Tuhan Mudah Raseuki

Oeh Singoh Sinyak Na Kelebihan
Bek Tuwoe Sayang Beu Le Berbagi
Mandum Ata Nyoe Titipan Tuhan
Geu Tanyoe Sayang Beu Tasyukuri

Bek Aneuk Udep Ngon Keangkuhan
Bek Sampe Sayang Leumpah Berbagi
Bek Gata Aneuk Lage Malin Kundang
Wate Na Kelebihan Poma Tan Tapeuduli

Beu Na Ta Ingat Poma Ngon Ayah
Supaya Beurkah Mandum Raseuki
Kadang Chit Neujok Ijin Le Po Tullah
Ta Meu Grak Langkah Utanoh Suci

Le That Fahala Aneuk Meutuwah
Poma Ngon Ayah Ta Peu Ek Haji
Umu Teuh Panyang Aneuk Meutuwah
Doa Mak Ngon Yah Tak Henti-henti

Lailahaillah Muhammad Rasulullah
Lailahaillah Aneuk Mtuwah Lam Ayon Doda
Teungeut Hai Aneuk Beu Rijang-rijang
Beu Goet Takeunang Dum Jasa Poma

Lailahaillah Muhammadur Rasulullah
Lailahaillah Muhammadur Rasulullah

Bagikan Artikel ini